السلام عليكم
احم احم ... تست تست
ون تو ثرى ... الصوت واصل تمام
معلش كنت بتأكد بس ان التراب اللى ف المدونة مش مأثر ع الصوت
لسه داخل من بره
كنت فى فرح فى احدى القاعات ف الزقازيق
والفرح يعتبر شبه عائلى وده اللى خلانى اروح !!!
بس مش عائلى اوى يعنى هما ناس نعرفهم
المهم ...
رايح انا وماما وبابا واختى ومرمر وام مرمر
المهم رحنا نركب فركبو تاكسى وانا حصلتهم مواصلات
المكان مش بعيد والقاعة المفروض عارف مكانها
المهم لقيت اسم القاعة فبصيت كده ... مش سامع حاجة
ومش ملاحظ حاجة برضو
قولت ارن على بابا بس هو مسمعش
قولت يالا ودخلت القاعة والحمد لله كنت ف المكان الصح
الحضور مش كتير فى البداية
فى هدوء نوعاً ما فـ القاعة على عكس المفروض ف الفرح
سملت ع الناس اللى اعرفهم واهلا وسهلاً وكده
وطبعاً بم ان مفيش غير بابا وماما والناس اللى قولتهم قبل كده اللى اعرفهم
فطبعاً قاعد معاهم
الدى جى الكاااااارثة
انا داخل كان مشغل نجاة !!! مع احترامى الكامل لشخصها بس احنا داخلين على فرح المفروض
او زى ما انا معتقد يعنى وغالبا الاعتقاد ده عند الناس اللى قاعدين
قولت لمرمر تعالى نروح للراجل ده نقوله يجيب اى حاجة ورفضت - مرمر صغننة يا جماعة -
رحت لوحدى وقولتله
انا : باشا عاوزين حاجة لعمر - و - دياب (على سبيل المزاح)
هو: مين ؟؟؟
انا : علامات تعجب علامات تعجب
انا مرة تانية : عمرو دياب اى حاجة ... احنا داخلين على فرح يعنى
هو: حاضر هشوفلك عمرو دياب
بغض النظر عن انه نفضلى !
رجعت ع التربيزة اللى قاعدين عليها ومنتظر اى حاجة احس انى قاعد فى فرح
وبعدين لقيته اتحرك من بعيد كده وماسك كام سى دى قولت فلة
هيغير اهو
وفعلاً غير ... موسيقى واغانى اجنبى وهدوووووووء ورومانسية
ياراجل حراام عليك احنا داخلين على فررررررررح
المهم شوية وجت العروسة والعريس
قدمنا شاشة شايفين عليها مجريات الامور المهم اكتشفت انه مش فرح !!!
غالبا خطوبة ولسه مش اتاكدت بس اكيد طبعاً بما ان الفستان مش ابيض
الا لو غيرو التقاليد المصرية فى الزفاف وخلو الفستان لونه
لونه لونه ... للاسف انا فاشل ف الالوان ولكن غالبا لونه بينك
طيب المفروض بقى الدى جى يبقى ليه دور بقى ... فرح يا رجااالة
واستمر ف الهدوء شوية كده !!!
المهم والحمد لله بدأ فى اغانى عربى تدل على اننا فى فرح
وبرضو مش هننا عليها كل شوية يوصل لنص الاغنية ويدخل فى تانية
وازداد الامر سوءً لما شغل بعد الاغانى المسفة
ربنا يسامحك يااراجل
المهم انا ومرمر وام مرمر قمنا نمشى بقى لان الوضع كده لا يحمس
واحنا كنا متفقين شوية وهنمشى
وسيبنا بابا وماما واختى هما حالياً فى الفرح
فى النهاية ربنا يتمم للعروسين فى خير وعلى خير
ونصيحة فى ودانكو لو كانت دى الخطوبة اوووعووووووو تحجزو القاعة دى مرة تانية
وشكراً
3 اللى ردو لغاية دلوقتى:
و عليكم السلااااام
تسسسسسسست تسسسسسسسسسسسسسسسسسست
بتست أنا كمان مليش نفس و لا ايه D:
و إليكم الكومنت المفصل
أنا بقيت أول ما ابدأ قراءه اى حاجه اعد ابنى فى توقعات :)
أول ما قريت الكام سطر اللى فى الأول قلت انك دخلت فرح غلط و اتمسكت جوا D:
بس كويس انك دخلت الفرح الصح :) :)
حلوه علامات تعجب علامات تعجب
أنا بقضى نص يومى كل يومى عباره عن علامه تعجب كبيره طالعلها رجلين D:
هى نجاه غريبه شويه بس الموسيقى الهاديه حلوووووه مش احسن ما يشغلك سعد الصغير D:
عسل يا مرمر ... بتاخدى مواقف من يومك يا بنتى D:
الألوان دى بقت موسوعه لوحدها
أنا لسه عارفه من شهرين ان فيه لون اسمه جنزارى D:
مش عارفه بصراحه الاسم مستوحى من ايه بالظبط خصوصا انه درجه من درجات الأخضر
هبقى أورهولك على الار جى بى D:
يلا يا عم كل فرح و انت بخير و عقباااااااالك يااااااااااااارب :)
ههههههههههههه
حلو الكلام الى فوق دة .. مدونتك جميله ربنا يحفظهالك :D ههههههه
إرسال تعليق